De la mountagno à la mar

 

retrouvez toutes les informations de la culture provençale sur http://prouvenço.presso-free.fr

 

Me dison Gouteto. Siéu uno pichoto gouto au mitan de miliard d'àutri gouto, e siéu en trin de degoula dóu cèu dins un raias d'estiéu. Ai agu la crespino de toumba dins un pichot regoulet qu'a bèn amourti moun arribado. Dous terrenau qu'acampavon de cacalauso, m'an apres qu'ère à Mount-Genèbre.

Ai coumença de regouleja au mitan d'erbage e de flour, em'acò, siéu arribado dins un pichot rajeiròu, aqui i'a mai d'aigo, sian plus noumbrouso, se sian acampado. Pièi, lou rajeiròu es devengu ribeireto e coumençan à serpenteja au mitan d'aubre e de roucas blanquinèu d'uno nèu tardivo. Lou soulèu, qu'es revengu, assaje de passa entre li branco d'aubre pèr veni se miraia dins l'aigo claro au trefouns di gorgo.

La ribeireto a groussi pèr deveni uno ribeiro, e se sian proumenado ansin un parèu de jour. Subran! lou courrènt acoumença à demeni e li dougo à s'aluiencha; uno gouto dóu bord a ausi dire qu'arribavian au lau de Serro-Pounçoun.

Avançan quàsi plus. Pendènt forço jour, se sian radassado en alucant lou païsage fin-qu'uno grando muraio nous a barra lou camin. Me siéu sarrado vers lou bord, e aqui, ai barrula dins un canalet pentu e clafi de chicano pèr ralenti lou rajant; se dis "uno escalo à pèis". Li pèis devon remounta la ribiero pèr ana sus li rode d'eissagage mounte coumençon à se cousseja, poundon lis iòu pièi, parton tourna-mai dins si cantoun d'ourigino. Sènso aquélis escalo, li pèis poudrien pas ana sus li endré de pounto, ço que coumproumetrié la reprouducioun. Aro, siéu toustèms au pèd de l'escalo dins un bouiounamen sènso fin, vau au founs, remounte, arribe à la longo à m'escapa e à reprendre moun camin emé mi sòci.

La ribiero es devengudo un grand flume, l'aigo se partajo en plusiour rajeiròu que serpentejon au mitan de soun lié. Fau dire que sian en estièu e lou debit de la Durènço es au mai bas. Soun lié es large, à la marrido sesoun carrejo d'aigo mai que n'en pòu, e quàuqui fes arribo meme à s'escampa.

Ai persegui 'm'acò ma davalado pendènt quàuqui jour.

Quouro siéu arribado vers la Roco d'Anteroun, lou courrènt ounte barquejave s'es couida à man gauche e me siéu retroubado dins un canau: veniéu de quita la Durènço.

Eici, siéu mens brassejado, i'a ges de roco pèr nous barra la routo, un courrènt regulié, de dougo propro; au passage, ai aprés qu'ère dins lou canau de "Craponne".

En passant, vau vous parla un pau d'aquest ome qu'a fa de la Crau e de la Prouvènço dessecado uno ouasis verdoulènto.

"Craponne" prenouma "Adam", nascu en milo-cinq-cènt-vinto-sièis o vinto-sèt, sabon pas bèn, es mort en milo-cinq-cènt-setanto-sièis dins de coundicioun misteriouso. Engeniaire dóu Rèi, èro un ome determina, voulountàri, inteligènt, forço estima dins Seloun.

A coumença lou cavamen de soun canau en milo-cinq-cènt-cinquanto-quatre; à si frès. Sa famiho, sis ami e meme Nostradamus l'an bèn ajuda pèr li picaioun. S'es talamen envesti dins sis obro, qu'a jamai vougu se marrida; mai coume èro un pau "sauto-langousto", e bel ome 'm'acò, a pas manca de femo, a agu forço aventuro galanto.

Aro que sabès tout, reprene moun camin.

De canau en canalet, me siéu retroubado dins un prat, aqui poudian passeja pertout entre lis erbage, mai forço de mi sorre s'arrestavon en camin e desparecien en terro. Ai lèu coumprés qu'érian aquito pèr abéura li planto. E, O! lis ome bevon pèr la bouco, li planto pèr li pèd. Coume vouliéu vèire d'autre païs, me siéu arrenjado pèr èstre toujour sus lou mouloun e, sènso m'arresta, siéu arribado dins un pichot canalet que m'a mena devina mounte? Dins la Touloubro.

A l'èr d'uno ribeireto tranquileto. Sus lou bord, un pescaire assaje d'aganta un pèis (ai après acò en camin), justamen, n'i'a un que vèn ié mastega lou verme. Aqui, s'es fa couiouna, es resta pendoula à n'un crouchet, lou pescaire l'a sourti de l'aigo 'mé vigour, es arriba sus terro en mens de dous, un cop de souco sus la tèsto pèr l'ensuca, e zóu! dins la museto, n'en vaqui un qu'es bon pèr la grasiho. Perqué fau vous dire qu'aquéli gènt manjon tout: li biòu, li pèis, lis aucèu e meme li planto, fan tres repas pèr jour quand es pas quatre, tambèn, m'en vau lèu qu'ai ausi dire que buvien meme l'aigo. E, plan planet, coumence à serpentaja en alucant amirativamen aquéu païsage.

Arrive à 'n'un vièi-pont, bèn counserva, dison qu'es un pont rouman. Es sus aquéu pont que passavo la routo de Marsiho à Sant Chamas lou pais de "Lei gènt dóu baou" (uno pougnado de galejaire qu'assajon de manteni li tradicioun).

Après un parèu d'ouro de flanage, siéu arribado dins un endré sènso dougo e'm'uno grando estendudo d'aigo calamo, à l'infinido. Parèi qu'es la grand mar de Berro, la mar di sereno.

Vau m'arresta e crese qu'acabarai mi jour eici…